СНЕГ

Кога врне снег
Како да се обидува небото
Да ми ја потрупа тагата.

Кон сртот јазат елени
Не од снег
Туку од тага

Побелени.

Михаил Ренџов




РАЗДЕЛБА

Заминуваш и не се вртиш.
Страв прастар страв од скаменување
Е она што во тебе ’рти
ко бол од едно одминување.

Заминуваш и носиш многу
во таа своја нема закана
без пораки без прошка и без збогум
смраморена и неизнаплакана.

Заминуваш заитана без глас
со прпот на преплашена препелица
Исчезнуваш во невратка и в час
стануваш сенка во невиделица.

Гане Тодоровски